balitaw sa facebook

Usa ni si Errol sa akong mga nahigala didto sa Bacolod. Daku na pod ni siya'y nasinati sa pagsuwat dili lang sa pinulongan sa Cebuano-Bisaya apan sa English ug Tagalog pod. Nalingaw lang ko aning gamay niya komento nga karon gihimong mga linya sa sumbingay.

Inday Cindz:
Habuhabo ug Taligsik


Dong Errol:
Human sa mga taligsik muguwa ang bangaw sa panganod, unta makauban ang matahom nimong pahiyom nga tugdunan sa mga tamsi ibabaw sa bangaw..


Inday Cindz:
Ug sa matag sidlak sa bidlisiw sa adlaw, tagsa-tagsang gihinlo ang kamingaw sa atong kasingkasing. Ug sa tukmang higayon, magkahimamat og balik ang atong mga pahiyom. Apan hain man ka inig huros og balik sa hangin? Hain ka inig lamoy og balik sa kangitngit aning mga panganod? Sultii ko, hain man ka?


Dong Errol:
ayaw ko pangitaa kay ang mga nangawala ra ang ginapangita, kay naa rako nagkapyot sa lugas sa imong buhok, naa rako nag dagan dagan sa imong nawong, sa imong abaga, sa imong bukton, sa imong tudlo, hangyo lang nako, kumkumo og maayo ang imong kamot aron dili ko mahulog.

Inday Cindz:
Gipadungay ko ang akong buhok sama sa una natong panagkita, apan dili na sama kaniadto ang imong paghapuhap. Nibikog ang akong mga tudlo sa pagtimaan nako nimo, hinay-hinay nga nihalok ka sa akong ngabil, sama sa usa ka eskultor nga mokudlit sa akong panit. Dayon, kalit lang nakahinumdom ko sa unang higayon nga gisubay nimo ang akong abaga, bugkton ug tudlo. Nipiyong ko aron subayon nimo og balik ang tanan. Apan karon, ipalawig kita sa agas sa tubig, aron di mahanaw ang imong katahom sa kagubot sa kong kamot.

maayong hapon, banawa

Usa ka hapon, nagbaktas lang ko padung Banawa (sa ikaduhang higayon) uban sa mga kanding ug mga bata nga di mahutdan og duwa. Huwaton ta nako ang pagsalop sa adlaw apan di man maayo ang panahon. Ug mao to nauwanan ko, hastang nikusog ang pagbisbis sa uwan (maayo na lang nakadala og kalo).

Apan ang tinuod, nalipay ko sa akong pagbaktas og balik. Baktas lang aron makat-on ka nga di sayon ang pagsaka sa taas ug dili nato mabanabana ug mataghap ang uwan o bisan pa ang kainit sa adlaw.

Busa, baktas lang ta og balik.

sa lain-laing panumdoman sa punoan sa kalipay

ang ugat: alang ni mam hope

sa usa ka tanaman, ikaw ang nagbabarog sa punoan.

kadtong duha ka san miguel light nga nagsumpay natong duha, ang usa sa di nako malimtan. inuban pa sa atong mga kulokabildo kabahin sa gugma ug literatura. salamat sa mga panghupaw ug pahiyom nga imong gipaambit atong gabhiona. di ko kalimut sa atong mga sekreto nga saksi lang ang imong sakyanan. ug bisan nag-uwan samtang padung ta sa kadalanan sa lahug di gihapon ta mahutdan og maestorya. tuod, di lang ta paingon sa paghandum sa kinataposang tagay alang ni nyor tem.

ang dahon: alang ni gibb

sumala sa akong klase sa bayolohiya, adunay gitawag nga "photosynthesis" ug nakahinumdom ko nimo. kahibalo ka kon ngano? di ba nahisgotan nimo nako nga ganahan kaayo ka sa adlaw kaysa sa uwan. ug ang imong angga pa gani kay "sun worshiper". ug kining dahon sama nimo, nabuhi tungod sa kahayag ug kasidlak sa adlaw.

salamat sa libro, gamay lang ni nga pulong sa pagpasalamat apan nalipay kaayo ko nga sa nangaging mga buwan kay nagkaila na gyod ta didto sa argao ug kini nagpadayon pa.

ang buwak: alang ni pra-pra

ang alimyon ug katahom nimo ang kinabuhi ning punoan.

sama kanako, kahibalo ko nga moabot ang panahon nga di na magsuot-suot ang imong alibangbang bisan sa iyang paglibot-libot kay molupad na siya og balik nimo (aka si miguel).

tanang kalipay alang nimo, salamat sa mga gihay sa panaghigala.